Tag Archives: voluntariado

Xornadas de formación de voluntariado para o V Encontro escolar de xogos tradicionais

O venres 9 de Abril na Coruña (CIFP Ánxel Casal) e o sábado 10 de Abril en Lugo (Pazo de Feiras e Congresos) celebráronse as primeiras quendas de formación do voluntariado que participará no V Encontro escolar de xogos tradicionais.

Baixo a dirección de Xabier López, Carmela Rodríguez e Alberto Casal (membros da directiva de Brinquedia), unha trintena de persoas vivenciaron as diferentes propostas lúdicas que o 22 de Maio poderán atoparse no citado Encontro escolar.

Hai que salientar a boa disposición que amosaron todas as persoas participantes, quizais tamén debido á súa formación en organización de actividades, animación e dinamización sociocultural, así como ás direccións dos centros onde se realizou dita formación, poñendo ao noso dispor as súas instalacións.

Outro feito singular é a disparidade de procedencias das participantes (en feminino, pois na súa maioría foron mulleres), tanto da nosa xeografía como incluso de fóra do país.

Formación voluntariado V encontro escolar de xogo tradicional (11 photos)
21 Abril 2010, A Coruña, Lugo
Imaxes tomadas durante a celebración da formación de voluntariado para o V Encontro Escolar de Xogo Tradicional que terá lugar o vindeiro 22 de maio en Lugo.

Note: To see the pictures in the original Picasa album, click here

Convocatoria para participar como voluntaria/o no V Encontro Escolar de Xogos Tradicionais

Dende Brinquedia, como en anos anteriores, convidámosvos a que participedes na Organización do V Encontro Escolar de Xogos Tradicionais. A vosa aportación como voluntarias e voluntarios para monitorizar os xogos non só enriquece a vosa formación, senón tamén enche de valores positivos o contacto cos centos de nenas e nenos que cada ano acuden á nosa convocatoria, divulgando o patrimonio lúdico comezando pola base, polos escolares galegos e os seu futuros ensinantes.

Como novidade, e mellorando o proceso formativo, poderemos emitir unha certificación oficial a través da Universidade de Santiago de Compostela – Campus de Lugo. Emporiso, para que poidamos certificar a vosa participación, as persoas que desexen colaborar no V Encontro de Xogos Tradicionais deben inscribirse antes do 15 de marzo como voluntarios na oficina do SEPIU e asistir á formación programada por Brinquedia-Rede Galega de Xogo Tradicional. Para optar a esa certificación oficial deberedes contactar con:

Fátima Teixeiro
Servizo de Participación e Integración Universitaria
Edificio Intercentros. Campus de Lugo  –
982 285 900 ext 23573

E para participar na formación, enviade un correo a brinquedia@brinquedia.net adxuntando a ficha de datos (datos_voluntariado) cuberta.

Máis información: