Category Archives: novas

Xornada de Xogos Tradicionais no IES Porto do Son

A mañá do xoves 25 de febreiro os alumnos do ciclo medio de “Técnico en condución de actividades físicas no medio natural” coa súa profesora Paula recibiron a visita de Daniel Pino e X. Manuel Barreiro, membros de Brinquedia.

   

Durante as máis de dúas horas que durou a xornada o alumnado tivo a oportunidade de descubrir unha serie de xogos tradicionais como “ os ovos”, “os tres pés”, “os aros”, “pasa perico,pasa mosteiro”, “ a billarda”, a zorregada co cinto”, “ a malla”,“ a trompa”… que non só os fixeron gozar coa súa práctica senón que ademais servíronlle para encher o seu cartafol dunha sabedoría que de seguro lles será de moita utilidade nun futuro moi próximo.

   

A xornada resultou moi frutífera , tanto para o alumnado como para o profesorado e monitorado. Nela púidose comprobar a validez dos enredos de sempre para as actividades a desenvolver en dito ciclo como constatar que o esforzo e compromiso de moita xente co noso patrimonio lúdico está prendendo nas novas xeracións, o que nos fai ver o futuro con moita esperanza e afrontalo con renovadas ilusións.

              

Día do Peón 2020

Dadas as especiais circunstancias que estamos a vivir, este ano será “diferente” no tocante ao Día do Peón.

Debido ás restriccións, non poderá haber un Acto Central nin se poderán organizar celebracións nos centros educativos coma duns anos para aquí se viñan facendo.

Pero a mal tempo …  Existen solucións para continuar a manter vivo este xogo tan noso:

  • Traballalo nas clases de Educación Física.
  • Promover a súa práctica no fogar cos familiares conviventes.
  • Fomentar a súa práctica nos recreos (naqueles centros que dispoñen de espazos diferenciados).
  • Ao fío do anterior, organizar o día 11 tiradas “conxuntas” (aínda que haxa separación física entre grupos).
  • E … Todo aquelo que en cada centro, en función da súa casuística, teña a ben organizar.

Lembrade que tedes ao voso dispor, no apartado de “Recursos”, unha variada oferta de actividades e propostas que poden ser do voso interese (clic na seguinte imaxe para acceder directamente):

E xa para rematar, lembrade que este xogo pode ser un fantástico recurso para ser empregado nos recreos. Somos sabedores de que nos centros educativos, debido á imposibilidade de empregar materiais conxuntos, están a darse problemas de conflictividade derivados do “non ter que facer”. Pois ben, o peón pode ser ese recurso que mellore o tempo de lecer do alumnado e que contribúa a un mellor clima escolar.

Dende Brinquedia agardamos que, a partires do San Martiño, os nosos peóns, buxainas e trompos continúen a virar. Porque o COVID nin pode nin debe acabar con este senlleiro xogo.

 

Torneo de chave en O Grove

Dentro das Xornadas Marisqueiras, este sábado ás 18:00 h desenvolverase un torneo de chave no parque de Confín na localidade de O Grove.

A inscrición poderá realizarse no mesmo día, polo que animamos a toda a xente asistente a que se anime a tirar uns pellos!