Arquivo da categoría: dia do peón

Como xa reflectimos na anterior entrada, este ano o Acto Central terá lugar no CPI de San Sadurniño.

Para saber máis das actividades e participantes, facede clic na seguinte imaxe e accederedes ao publicado na súa páxina web:

Outro ano máis,  achegándonos ao mes de novembro, temos a ben convocar a celebración do Día do Peón.

Baixo o lema de “Polo San Martiño, peóns ao camiño”, pretendemos que o día 11 de novembro convírtase nun día no que os peóns, bailados tanto por nenos como polos non tan nenos, bailen e requebren por toda a xeografía galega.

Así, nun correo electrónico enviado aos centros de ensino galegos, así coma a outras entidades e asociacións, convidamos a participar nesta actividade que, neste ano, suma xa a súa undécima edición.

A documentación elaborada para esta edición é a seguinte, podéndose descargar cada un dos documentos facendo clic na súa respectiva imaxe:

                   Cartaz                                  Ligazóns de interese

 Exposición “O peón, un mundo de amigos”

Manifesto

Cuestionario de recollida de datos para os centros participantes (cumprimentación en liña)

Por outra banda, na nosa canle de Brinquedia en Youtube, hai colgados uns vídeos que consideramos poden ser do voso interese.

Xa para rematar, podemos confirmar que o Acto Central celebrarase este ano no CPI de San Sadurniño (provincia de A Coruña), acto ao que acoderán convidados 5 centros educativos da comarca e que sumará máis de 500 alumnos/as participantes.

Nesta edición do Día do Peón celebrouse o Acto Central “por todo o alto”, xa que tivo lugar no CEIP de Manzaneda, o colexio situado a maior altitude de Galicia.

As actividades que se desenvolveron con motivo deste Acto Central foron as seguintes:

• Montaxe da exposición “O peón, un mundo de amigos”, cedida pola asociación Amics de la Baldufa e impresa en formato exposición (pode ser solicitada ao Centro de Cultura Popular Xaquín Lorenzo).
• Houbo charla e obradoiro de peóns.

• Deuse lectura ao manifesto, para o que se contou coa presenza do autor do mesmo, Florencio de Arboiro.

• E xa que o manifesto fala dos afiadores, uníronse estes dous aspectos culturais que dan voltas (peóns e rodas de afiar).

• Contábase coa visita dos usuarios e usuarias da Residencia de Maiores, pero por mor do mal tempo houbo que pospoñer a actividade con eles ata a tarde, con quen se realizou un obradoiro xunto coas traballadoras da residencia.

Temos que agradecer a colaboración das seguintes entidades e persoas que fixeron posible a realización destas actividades:

• Centro de Cultura Popular Xaquín Lorenzo (Deputación de Ourense).
• CEIP de Manzaneda.
• Florencio de Arboiro, redactor do manifesto, escultor e director do Museo Casa das Rodas.
• Concello de Manzaneda.
• Residencia Municipal de Maiores de Manzaneda